Ad gentes

1. Tarmessa da Diu als pievels duei la Baselgia esser «il sacrament universal dil salit» (Lumen Gentium 48). La Baselgia sesprova da purtar a tuts carstgauns igl Evangeli, conform alla natira pli profunda de sia catolicitad e al mandat de siu fundatur. […]

Dall’autra vart, ella situaziun actuala dil mund, ella quala seprofilescha ina nova situaziun per la carstgaunadad, […] desiderescha questa sontga sinoda da rimnar las forzas de tut ils fideivels, sinaquei ch’il pievel de Diu possi derasar il reginavel de Cristus caminond tras la via stretga della crusch […].

[…]

21. La Baselgia ei aunc buca fundada facticamein, ha aunc buca cuntonschiu sia cumpleina veta, ei aunc buca dil tut il signal de Cristus enamiez ils carstgauns, sch’ei dat buca ensemen cun la hierarchia in autentic stan laical che lavura. Pertgei igl Evangeli sa buca penetrar bein en la mentalitad, ellas isonzas ed ella activitad ded in pievel, sch’ei maunca la preschientscha dinamica dils laics. Perquei ston ins far tut quitau ed attenziun alla formaziun ded in laicat madir cristian gia naven dalla fundaziun ded ina Baselgia.

Pertgei ils laics cartents s’audan el medem temps diltut al Pievel de Diu e diltut alla societad civila. Els s’audan tier lur pievel, nua ch’els ein naschi, e nua ch’els han giu part ed han part dils beins della cultura entras lur educziun. Mo els s’audan el medem temps era a Cristus, damai ch’els ein renaschi ella Baselgia entras la cardientscha ed il batten, sinaquei ch’els seigien de Cristus, daventai novs ella veta ed en l’ovra, e sinquei che tut en Cristus seigi suttamess a Diu, e che finalmein Dieus seigi tut en tut.

Il pensum principal dils laics, dils umens e dellas dunnas, ei la perdetga de Cristus ch’els han da dar cun la veta e cul plaid en lur famiglia, ella gruppa sociala alla quala els appartegnan, ed egl ambient professunal nua ch’els lavuran. […] Gie, leu nua ch’igl ei pusseivel, duein ils laics esser promts da luvrar pli stretgamein ensemen cun la hierarchia, svulvend missiuns specialas per annunziar igl Evangeli e derasar la ductrina cristiana.

Ils ministers della Baselgia hagien da lur vart gronda stema dell’activitad apostolica dils laics: educheschien els a quei senn de responsbladad ch’oblighescha els sco members de Cristus avon tut ils carstgauns. […]

[…]

35. Essend la Baselgia entira missiunara, ed essend l’evangelisaziun in duer fundamental dil Pievel de Diu, envida il sogn concil tut ils fideivels ad ina prfounda renovaziun interiura, sinaquei ch’els surprendien lur part ell’ovra missiunara tier ils pievels.

[…]