dad Andri Casanova
All’entschatta dalla Palentada illustrescha Gion co el ei vegnius clamaus dil Segner. Igl ei caracteristic ch’el fa quei en connex cun ina da sias visiuns. Per capir quellas visiuns, tut ils simbols ed il messadi dalla scartira, ein bunas enconuschientschas dil Veder Testament necessarias. Gion fa diever da numerus maletgs neu dil Veder Testament.
En la Palentada sedrezza Gion a siat cuminonzas dall’Asia minora, e quei duront in temps da persecuziun e tribulaziun. Gion accentuescha ch’ellas duein buca ver tema ed esser statteivlas. Cristus ch’ei levaus da mort en veta, el stat enamiez siat candelabers – las siat cuminonzas – ed el vul dar in avegnir allas cuminonzas. El ei gie quel che ha pussonza sur da veta e mort, el ei pia pli ferms che mintga prighel e smanatscha.
Pal 1,9–11a.12–13.17–19
Jeu, Gion, vies frar e vies cumpogn ella tribulaziun, el reginavel ed ella perseveronza enten Jesus, jeu erel sin l’insla, numnada Patmos, per amur dil plaid da Diu e muort la perdetga en favur
da Jesus.
Il di dil Segner sun jeu vegnius tschaffaus dil Spert ed hai udiu davos mei ina ferma vusch sco d’ina posauna, che ha detg:
Scriva en in cudisch quei che ti vesas!
Cheu sun jeu seviults per mirar quella vusch che plidava cun mei. E semenaus entuorn hai jeu viu siat candelabers d’aur, ed enamiez ils candelabers enzatgi semeglionts al Fegl dil carstgaun,
vestgius cun ina rassa tocca plaun e cun ina tschenta d’aur entuorn veta.
Cu jeu hai viu el, sun jeu curdaus sco in miert avon ses peis. Mo el ha tschentau siu maun dretg sin mei e detg: Buca tema! Jeu sun igl emprem ed il davos ed il vivent. Jeu erel morts, e mira,
jeu vivel da perpeten en perpeten, e jeu hai las clavs dalla mort e dils uffiarns.
Scriva pia quei che ti has viu, quei che ei e quei che duei daventar en avegnir.
☛ 1. lecziun dalla dumengia: Fatgs 5,12–16
☛ evangeli dalla dumengia: Gn 20,19–31
