da Marcel Köhle
Questa lecziun ord l’emprema brev a quels da Corint envida las lecturas ed ils lecturs da buca mo celebrar Pastgas, mobein era da nezegiar quella fiasta per renovar l’atgna veta. Paulus drova en sia brev persuenter il maletg dils pauns senza levon che vevan tier la fiasta da Pastgas dils Gedius ina gronda muntada.
Paun vegl, paun cun levon steva per il puccau e la malignadad, paun senza levon per puritad e nova veta. Tras la mort e levada da Niessegner essan era nus envidai da schar tut davos nus che sparta nus da Diu e da viver en sinceradad e verdad. Aschia daventa Pastgas buca mo ina fiasta dalla cardientscha, mobein era ina fiasta dalla renovaziun dils cors.
1 Cor 5,6b–8
Saveis buca ch’in tec levon po fermentar l’entira pasta? Sgarei ora il levon vegl, sinaquei che vus seigies ina pasta nova! Vus essas gie senza levon, pertgei sco nies tschut pascal ei Cristus
vegnius unfrius.
Nus lein pia far fiasta, buca cul levon vegl ed era buca cul levon dalla nauschadad e schliatadad, mobein cul paun nunfermentau dalla sinceradad e verdad.
☛ 1. lecziun dalla dumengia: Fatgs 10,34a.37–43
☛ 2. lecziun dalla dumengia (alternativa): Col 3,1–4
☛ evangeli dalla dumengia: Gn 20,1–9
