da Marcel Köhle
La dumengia da palmas ei empau ina fiasta dils cuntrasts e quei muossan era las differentas lecziuns biblicas da quella fiasta.
Dad ina vart vein nus igl evangeli che rapporta digl ingress festiv da Jesus a Jerusalem. Jesus vegn festivaus sco messias, il retg divin che porta il salit als carstgauns. Da l’autra vart vein nus la lecziun ord la brev a quels da Filippi che muossa in maletg meins festiv. Quel che vegn festivaus quella dumengia sco salvader, ei era quel che va la via dalla crusch. Entras ir quella via che meina dalla passiun e mort alla levada, vegn revelau a nus la vera grondezia da quei retg ch’ils carstgauns han festivau lezza gada a Jerusalem.
La lecziun da questa dumengia envida las lecturas ed ils lecturs da seprofundar en quei misteri che vegn festivaus ella jamna sontga.
Fil 2,6–11
Schegie che Jesus Cristus
fuva en la fuorma da Diu,
ha el buca taxau ei sco in bein da rapina
dad esser aduals a Diu.
El ha biaronz spogliau sesez,
ha acceptau la fuorma da fumegl
ed ei daventaus semeglionts als carstgauns.
Taxaus en sia cumparsa exteriura sco in carstgaun,
eis el sehumiliaus,
ei daventaus obedeivels entochen la mort,
gie tochen la mort vid la crusch.
Perquei ha Dieus alzau el sur tuts
e dau ad el in num che survarga scadin num,
sinaquei ch’el num da Jesus
sestorschi mintga schanugl
en tschiel, sin tiara e sut la tiara,
e che mintga lieunga confessi:
Jesus Cristus ei il SignurEl grec ha ei num «kyrios», pia il Segner. Cheutras vegn fatg allusiun a siu esser divin.
per la gloria da Diu, il Bab.
☛ evangeli dalla dumengia: Mc 11,1–10 (B)
☛ 1. lecziun dalla dumengia: Jes 50,4–7 (ABC)
☛ passiun: Mc 14,1–15,47 (B)
