da Marcel Köhle
Il temps da cureisma envida da reflectar l’atgna cardientscha e dat forsa era inaga temps da ponderar sch’ins ei silla dretga via. Exercezis spirituals, sco la gigina, temps per oraziuns ed il silenzi duein gidar sin quella via. Mo tuts quels che han gia fatg tals exercezis san ch’igl ei buc adina sempel da tener la dira sur in pli liung temps, sco per exempel duront quels 40 dis da cureisma.
Ual ussa, cura ch’ei va plaunsiu encunter la fin dalla cureisma, plaida Paulus tgei gudogn ch’el ha ella cardientscha. Perquei less el era prender Niessegner per bien exempel e daventar pli semeglionts ad el. Mo el sez sa ch’el ei aunc sin via ed ha aunc buca contonschiu quella finamira. Mo el piarda buca la curascha e mira viers il futur.
Forsa duei quella lecziun era dar a nus la curascha da tener la dira en nos exercezis spirituals el temps da cureisma. Tut quei ei buca temps piars, mobein – sco Paulus di – gudogn per nossa veta e cardientscha.
Fil 3,8–14
Mes frarsCheu san ins leger «Mes frars e mias soras».! Jeu quentel daveras tut per in disavantatg en vesta digl enorm gudogn che
l’enconuschientscha da miu Segner Jesus Cristus munta. Per amur dad el hai jeu vuliu piarder tut e taxeschel ei sco rumien, sinaquei che jeu gudogni Cristus e vegni anflaus en el.
Jeu enquerel buca mia atgna giustia che deriva dalla lescha, mobein quella che vegn dalla cardientscha enten Cristus, la giustia che Dieus regala sin fundament dalla cardientscha.
Jeu vi enconuscher Cristus e la pussonza da sia levada e la cuminonza cun sia passiun, per daventar semeglionts ad el en sia mort. Aschia sperel jeu d’arrivar alla levada dils morts.
Buca che jeu vess gia contonschiu ei ni fuss gia perfetgs! Mo jeu sesprovel da contonscher ei, perquei ch’era jeu sun vegnius tschaffaus totalmein da Cristus Jesus.
Mes frarsCheu san ins leger «Mes frars e mias soras»., jeu fetschel buc illusiuns, che jeu hagi gia contonschiu la finamira.
Ina caussa fetschel jeu denton: Jeu emblidel il vargau e sestendel viers igl avegnir. La mira finala avon egl cuorel jeu viers il premi d’esser clamaus da surengiu tras Diu en Cristus Jesus.
