da Flurina Cavegn-Tomaschett
La libertad ei per sogn Paul in ferm tierm egl esser cristian. Quella libertad menziunescha el adina puspei. En la lecziun dad oz avertescha igl apiestel denton da fallidas segirtads. Mo
perquei ch’els ein battegiai ein las cristianas ed ils cristians buca liberai da tut puccau, independent da lur cunfar. Da memia segirtad fa ins tschocs enviers agens sbagls.
Sogn Paul drova maletgs ord il Veder Testament e trai parallelas denter il viadi dil pievel d’Israel ord l’Egipta ed ils cristians. Il passadi tras la mar cumpareglia el cun il batten, la spisa
da manna cun il paun eucaristic. La libertad regalada el batten duei vegnir duvrada a moda precauta, mo lu san ins viver en vera libertad.
1 Cor 10,1–6.10–12
Mes frarsCheu san ins leger «Mes frars e mias soras»., jeu less far endamen a vus ils suandonts fatgs: Nos perdavos ein tuts stai
sut la nebla e tuts han traversau la mar.
Tuts ein vegni battegiai enten Moses ella nebla ed ella mar.
Tuts han magliau la medema spisa spirituala e tuts han buiu la medema bubronda spirituala. Els han numnadamein buiu ord il grep spiritual che accumpignava els, e quei grep era il Messias.
E tonaton ha Dieus buca giu plascher dalla pli gronda part dad els.
Perquei ein els vegni sdernai el desiert.
Quels eveniments admoneschan nus sco exempel, sinaquei che nus veien buca schliats gargiaments, sco lezs han giu nauschas queidas.
E buca murmignei sco certins dad els han fatg ed ein perquei vegni liquidai tras il strunglader.
Tut quei ei capitau cun els per survir sco exempel ed ei era vegniu scret per avertir nus ch’essan arrivai alla fin dils temps.
Tgi che secrei pia da star sidretg, miri bein da buca curdar.
☛ 1. lecziun dalla dumengia: Ex 3,1–8a.13–15
☛ evangeli dalla dumengia: Lc 13,1–9
