da Flurina Cavegn-Tomaschett
Sogn Paul enconuscha buca persunalmein la pleiv da Roma. El scriva als cartents ed allas cartentas da Roma la pli liunga da sias brevs per declarar sia capientscha dil cristianissem. Las damondas fundamentalas ein: En tgei relaziun stattan la lescha e la cardientscha e tgei effectueschan ellas?
Ils plaids da questa lecziun sesprovan da colligiar la cardientscha ch’ei plantada el cor cun il confess dalla bucca. Sche la bucca confessescha che Jesus ei il Signur, sto quei confess gia esser francaus el cor. Bucca e cor s’audan ensemen. Quei confess sa derivar schibein da Gedius sco era da Grecs.
Ro 10,8–10
Mes frarsCheu san ins leger «Mes frars e mias soras».!
Tgei di la lescha? Maneivel da tei ei il plaid, en tia bucca ed en tiu cor, quei vul dir: Il plaid dalla cardientscha che nus perdeghein.
Pertgei sche ti confessas cun tia bucca che Jesus ei il Signur e creias en tiu cor che Dieus ha leventau el dils morts, vegns ti a vegnir salvaus.
Pertgei cul cor crei ins quei che meina alla giustia, e culla bucca confess’ins quei che meina al salit. La Scartira di gie: Scadin che crei enten el, vegn buc a vegnir en zanur.
Aschia dat ei negina differenza denter Gedius e Grecs: Il medem ei Signur da tuts, rehs per tut quels che invocheschan el. Pertgei scadin che invochescha il num dil Segner, vegn a vegnir salvaus.
