da ser Jan-Andrea Bernhard
Contas gadas vein nus il sentiment che nossa lavur, nossas stentas e premuras seigien adumbatten? Nus fagein quei e tschei, currin e gidein, vi e neu… adumbatten!
En tals muments emblidein nus il bia: Nus luvrein el curtgin da Niessegner, e cheu astgein buca emblidar il sguard, la vesta silla victoria sur dalla lamentaziun, sur dil cordoli, sur dalla crusch, gie sur dalla mort.
Ed eis ei buca aschia ch’era Cristus ha «luvrau», pia perdegau e medegau cheu e leu adumbatten – buca tuts ein vegni perschuadi. Denton ha el victorisau sur dil cordoli, sur dalla mort. En favur da quels che creien enten al sco Salvader.
«O mort, nua ei tia victoria? O mort, nua ei tiu uegl? Perquei, mes cars, seigies ferms e statteivels e fagei adina progress ell’ovra dil Segner.»
1 Cor 15,54–58
Mes frars! Inaga ch’il vargheivel vegn a trer en la nunvargheivladad, ed il mortal vegn a sevestgir cun l’immortalitad, lu vegn a serealisar il plaid ch’ei screts:
La mort ei laguttida ella victoria.
O mort, nua ei tia victoria?
O mort, nua ei tiu uegl?
Igl uegl dalla mort ei il puccau, e la forza dil puccau ei la lescha.
Ludaus seigi Dieus, perquei ch’el dat a nus la victoria tras Niessegner Jesus Cristus!
Perquei, mes zun carezai frarsIns sa leger «mes zun carezai frars e soras»., seigies ferms e statteivels e fagei adina progress
ell’ovra dil Segner. Seigies fermamein perschuadi che vossa stenta ei buc adumbatten avon il Segner.
