da ser Jan-Andrea Bernhard
Il text da quella lecziun discuora dad ina damonda centrala dad ozilgi: Il mund terrester, ed il mund celestial! Aschi bia vegn oz discurriu mo pli sur da damondas terrestras, e las damondas
spiritualas e celestialas vegnan exclusas.
Nun lein denton buca selamentar, quei ha gie era igl apiestel Paulus buca fatg. Plitost lein nus engraziar che nus astgein enconuscher buca mo «igl emprem carstgaun», igl Adam, mobein era «il
secund carstgaun», Niessegner Jesus Cristus.
Per nus ei quei in grondius privilegi! Esser burgheis da duas tiaras, esser descendents da dus carstgauns, esser artavels da dus munds: Astgar guder quest mund terrester, ed haver in avegnir en
tschei mund celestial.
E quei: sola gratia!
1 Cor 15,45–49
Adam, igl emprem carstgaun, ei vegnius scaffius sco creatira viventa.
Il davos Adam ei daventaus in spért che dat veta. Denton buca il tgierp spiritual ei staus igl emprem, mobein il natural e pér suenter il spiritual.
Igl emprem carstgaun, fatgs orda tiara, ei terresters; il secund carstgaun deriva da tschiel.
Sco igl emprem carstgaun ei terresters, aschia ein era ses descendents terresters, e sco il secund carstgaun ei celestials, aschia ein era ses descendents celestials.
Sco nus vein purtau la semeglia dil terrester, aschia vegnin nus era a purtar la semeglia dil celestial.
☛ 1. lecziun dalla dumengia: 1 Sam 26,2.7–9.12–13.22–23
☛ evangeli dalla dumengia: Lc 6,27–38
