da sur Marcus Flury
Paulus ei staus confruntaus cun ina cuminonza da differents carstgauns che vevan tuts la finamira d’esser la Baselgia da Jesus Cristus. La pleiv da Corint era in maletg dalla societad da quei marcau mundial, el qual ei deva grondas differenzas socialas e differentas modas da viver e patertgar.
Il plaid da clav en quella lecziun ei: Vus essas il tgierp da Cristus. Sogn Paul ha duvrau per quella cuminonza il maletg dil tgierp cun la biara e differenta membra. Nus essan battegiai en in Spert e daventein aschia in tgierp. Nus vein nos duns e nossas habilitads che nus savein activar culs auters e per ils auters.
Esser sco Baselgia il tgierp da Cristus. Quei munta: Far veseivels Cristus en nies mund.
Cristus vul ina Baselgia che effectuescha enzatgei ella societad humana. Leutier drova el nus tuts, in e scadina cun ses duns e sias incaricas.
1 Cor 12,12–14.27
versiun cuorta
Mes cars! Sco il tgierp ei mo in ed ha tonaton biara membra, e sco tut la membra dil tgierp fuorma malgrad sia pluralitad mo in tgierp, aschia era Cristus.
Pilver, nus tuts essan vegni battegiai en in Spert per daventar in sulet tgierp, ton Gedius sco Grecs, ton sclavs sco libers. E nus tuts essan vegni bubrentai cul medem Spert. Era il tgierp
secumpona gie buca mo dad in member, mobein da biars.
Vus essas pia il tgierp da Cristus, e mintga singul ei in member da quel.
☛ 1. lecziun dalla dumengia: Ne 8,2–4a.5–6.8–10
☛ evangeli dalla dumengia: Lc 1,1–4; 4,14–21
