da sur Marcus Flury
Differents duns – in Spert! Mintgin e mintgina ha sias habilitads. Quella lecziun fa curascha d’encurir e promover era ella Baselgia dad oz, en nossas pleivs da quels duns – vid nusezs, mo era vid ils auters. Era en nossas pleivs schabegia bia entras carstgauns che han buc in’incarica speciala. Cons carstgauns cun in dun pratic segidan cun auters senza gronds plaids! Nus vein carstgauns cun il dun da saver cussegliar ni consolar. Con dil bien fan els! Nus vein carstgauns cun ferma e perschuadenta cardientscha che san schar sentir auters tgei gronda forza che la cardientscha ei. Cun sogn Paul astgein nus dir: «Quei tut operescha il sulet e medem Spert che reparta ses duns a scadin sco el vul.»
Impurtont ei che nus duvreien ils duns dil Spert pil beinstar general. Leu nua che nus sestentein pil beinstar general, operein nus el Spert da Diu. Nus tuts vein duns e habilitads che nus savein duvrar el Spert da Cristus. Leu nua che nus fagein quei, realisein nus Baselgia da Jesus Cristus.
1 Cor 12,4–11
Ei dat differents duns spirituals, il Spert ei denton il medem.
Ei dat differents survetschs, denton mo in sulet Signur. Ei dat differentas forzas, Dieus ei denton il medem che operescha tut en tuts.
A scadin vegn la revelaziun dil Spert dada pil beinstar general.
Ad in vegn dau tras il Spert in plaid da sabientscha, a l’auter denton in plaid d’enconuschientscha tenor il medem Spert;
a quel il dun dalla cardientscha el medem Spert, a tschel il carisma da medegar tras quei sulet Spert; ad in vegn dau la forza da far miraclas, a l’auter la profezia, ad in auter il dun da
distinguer ils spérts;
a quel il dun da discuorer en lungatgs, a tschel il dun d’interpretar quella glossolaliatenor il grec in «plidar dalla lieunga», ina sort plidar
nunarticulau carismatic.
Quei tut operescha il sulet e medem Spert, che reparta ses duns a scadin sco el vul.
