da sora Armina Maissen
Era en quella lecziun, – e quei ei schon en la tiarza suenter la fiasta da Nadal, – udin nus puspei, co Dieus ei cheu per tuts, ch’el sclauda da sia carezia negin pievel e negin soli carstgaun. El ha tarmess siu Fegl per far veseivel quei. Sogn Pieder ha fatg quella experientscha cun siu magister Jesus treis onns. Cun tut sias fasas – sco sanguinicher e colericher, cun sia bunaveglia e cun sias fleivlezias – ha el viu, co Jesus mira buca sin la persuna, mobein tuts ein beinvegni ad el. Tuts vul el gidar. Per tuts ei el cheu. Sogn Pieder ha sentiu quei en sia atgna pial. El sto buca bargir pli, ch’el ha snegau Jesus. Tut ei perdunau. L’introducziun dalla lecziun: «Pieder ha priu il plaid e detg…» ei ina bellezia e perschuadida enzenna e confirmaziun da quei.
Jesus pretenda giustia. Ina tenuta, ina vertit, ch’il demuni po buca vertir. Perquei semna el malgiustia e discordia el mund. Jesus ha da lezzas uras medegau tut quels che stevan sut la pussonza dil demuni. Jesus ha quella pussonza – era oz. Forsa ei nossa cardientscha memia fleivla. Lein rugar adina puspei: «Segner, jeu creiel, gida mia nuncardientscha» (Mc 9,24).
Fatgs 10,34–38
Pieder ha priu il plaid e detg:
En verdad, ussa capeschel jeu, che Dieus mira buca silla persuna, mobein ch’en mintga pievel ei beinvegnius ad el tgi che ha tema dad el e pratichescha giustia. El ha tarmess il plaid (Vierv)Ins sa leger mo plaid, denton savend ch’igl ei manegiau Jesus Cristus. als fegls d’Israel, annunziond pasch entras Jesus Cristus
che ei il Signur da tuts.
Vus saveis tgei ch’ei daventau ella entira Giudea, entschevend en Galilea suenter il batten che Gion ha annunziau: Co Dieus ha unschiu Jesus da Nazaret cun Spert sogn e cun forza, co el ei ius
per la tiara entuorn, ha fatg dil bien e medegau tut quels che stevan sut la pussonza dil demuni; pertgei Dieus fuva cun el.
☛ emprema lecziun: Jes 42,1–7
☛ evangelis dalla dumengia:
Mt 3,13–17 (A)
Mc 1,6b–11 (B)
Lc 3,15–16.21–22 (C)
