da sora Armina Maissen
Tgei grondiusa perspectiva en quella lecziun; plaids ed empermischuns buca meins che da Diu sez, regalai en Jesus Cristus – siu plaid, ch’ei daventaus carstgaun, nies frar, in da nus.
Nus essan benedi cun tutta benedicziun dil tschiel.
Nus essan eligi, giavischai da Diu schon avon la scaffiziun dil mund.
Nus essan predestinai da daventar affons da Diu.
Nus essan artavels da sia rihezia e gloria.
Ils emprems cristians han cartiu en quella nuviala e viviu quella cun tuttas consequenzas.
Sogn Paul sa buca engraziar avunda per lur tenuta spirituala, che semusossa en cardientscha, fidonza e carezia in per l’auter. El numna els schizun «sogns».
E nus, astgein nus era semetter en retscha cun quels, ch’el numna sogns? Gie, jeu sun perschuadida da quei, aschilunsch ch’ei reussescha a nus da viver quella veta da cardientscha en plaids ed ovras. Il sem da sontgadad ei plantaus en mintga carstgaun, en Tei ed en mei. Cardientscha, fidonza e carezia nutreschan quel di per di e fan nus artavels dalla rihezia e gloria infinita.
Ef 1,3–6.15–18
Benedius seigi Dieus, il Bab da nies Segner Jesus Cristus, che ha benediu nus tras Cristus cun tutta benedicziun spirituala ch’ei dat en tschiel.
En el ha Dieus eligiu nus avon la creaziun dil mund, sinaquei che nus seigien sogns e senza macla avon sia fatscha.
Ord carezia ha el predestinau nus da daventar ses affons tras Jesus Cristus, tenor il beinplascher da sia voluntad, per laud e gloria da sia grazia ch’el ha regalau a nus entras siu Fegl
carezau.
E perquei sai jeu – dapi che jeu hai udiu da vossa cardientscha el Segner Jesus e da vossa carezia enviers tut ils sogns – buca calar d’engraziar, cu jeu seregordel da vus en mias oraziuns.
Il Diu da nies Segner Jesus Cristus, il Bab dalla gloria, detti a vus il Spert da sabientscha e revelaziun, sinaquei che vus pudeies enconuscher el.
El sclareschi ils egls da vos cors, per far capir vus, tgei speronza che siu clom arva a vus, tgei rihezia da gloria che sia ierta munta pils sogns.
