da Maria Cristina Derungs-Bartolomei
Quei text ei in dils pli enconuschents passadis dellas brevs de sogn Paul, cunquei ch’el vegn adina legius avon da Nadal notg. En in cert senn vegn en el resumaus e fatgs paleis igl entir artg dil misteri dil salvament, che sesarva cun la naschientscha historica de Jesus e secumplenescha cun sia secunda vegnida alla fin dil temps.
Il «cumparer» della grazia vegn exprimius egl original grec cul verb «epifanein», che vegn derar avon el Niev Testament; quei ei il medem plaid che dat num alla fiasta della «Epifania», Buania, che corunescha Nadal. La grazia de Diu ei «cumparida», vegnida e semanifestada en moda nunspitgada e gratuita. Ella renda nus habels de viver en giustia, pietad e prudientscha ed oblighescha nus vidlunder.
La medema grazia orientescha nus alla speronza ella secunda «epifania», a viver ella spetga dil secund Advent, la manifestaziun finala e gloriusa de nies Salvader. Quella spetga ei buca passiva, mobein seconcretisescha ella pratica della carezia proximala, en s’engaschar cun premura en ovras «bialas» (aschia di il text grec), en ovras che han la bellezia della buontad.
Tit 2,11–14
Cumparida ei la grazia da Diu che porta il salit a tuts carstgauns.
Ella muossa a nus da renunziar alla nuncardientscha ed als gargiaments mundans, da viver en quest mund present en prudientscha, giustia e pietad e da spitgar la ventireivla speronza e
l’appariziun dalla gloria da nies grond Diu e Salvader Jesus Cristus.
El ha unfriu sesez per nus per cumprar nus libers da tutta malgiustia e per purificar in pievel ch’appartegn ad el sco agen e ch’ei spir premura da far bunas ovras.
