da Marcel Köhle
La lecziun da questa dumengia vegn ord la brev als Hebrès e tematisescha il sacrifeci. Igl autur fa quei cun citar il psalm 40 e cun presentar Jesus sco quel che ademplescha l’unfrenda che plai a Diu. El accentuescha che las unfrendas entochen cheu eran imperfetgas, mo che Jesus ei vegnius per ademplir il plan dil salit che Dieus veva previu.
Quella lecziun ei segir buca in text ch’ins spitgass el temps d’advent. Mo quellas lingias ord la brev als Hebrès lessen tuttina menar noss’attenziun silla fiasta e cunquei era sil misteri da Nadal. – Quei affon el pursepen ei negin auter che nies salvader. El porta il salit che Dieus ha preparau per nus. – Sco quei affon crescha, aschia duei era la cardientscha e perschuasiun en nus crescher, che Jesus ei quel ch’ei vegnius da far la voluntad da Diu.
Possi quella lecziun, sco era il temps da Nadal animar nus da ponderar tgi che Jesus ei per nus e nossa veta.
Heb 10,5–10
Entrond el mund di Cristus:
Sacrifecis ed unfrendas has ti buca vuliu,
mo in tgierp has ti preparau a mi.
Unfrendas d’aduraziun e d’expiaziun plaian buc a ti.
Cheu hai jeu detg: Mira, jeu vegnel –
el cudisch biblic stat ei scret sur da mei –,
per far tia voluntad, o Diu.
Igl emprem di el: Sacrifecis ed unfrendas, unfrendas d’aduraziun e d’expiaziun pretendas ti buc e talas plaian buc a ti, schegie che quellas vegnan fatgas tenor la lescha. Mo lu di el: Mira, jeu
vegnel per far tia voluntad. El annullescha igl emprem, per metter en vigur il secund.
Sin fundament da quella voluntad essan nus sanctificai ina ga per adina tras l’unfrenda dil tgierp da Jesus Cristus.
