da Marcel Köhle
La lecziun dalla tiarza dumengia d’advent ei in passadi ord la davosa part dalla brev a quels da Filippi. Il messadi ei sempels e bein capeivels: Selegrei! Selegrei perquei ch’il Segner ei damaneivel!
Ils plaids da quei messadi lain era regurdar nus empau ad ina historia ord il Veder Testament, numnadamein alla historia nua che Dieus ei serevelaus a Moses (Exodus 3). El spinatsch ardent revelescha Dieus siu num. El ei JHWH e quei munta: Jeu sun cheu, jeu sun damaneivel a vus.
Igl ei la tiarza dumengia d’advent e la fiasta da Nadal vegn adina pli damaneivla. Beingleiti udin nus puspei la nuviala dalla naschientscha da Jesus e che Dieus vegn aschia damaneivel als carstgauns. Jeu manegel ch’ei vala adina puspei da ponderar e meditar quella nuviala. Ina nuviala che porta glisch e legria el stgir e freid dil temps d’unviern.
Fil 4,4–7
Selegrei adina enten il Segner! Jeu tuornel a dir: Selegrei!
Vossa migeivladad vegni enconuschenta a tuts carstgauns.
Il Segner ei damaneivel!
Buca fagei quitaus, mobein purtei adina e dapertut en ferventa oraziun e cun engraziament vossas supplicas avon Diu!
E la pasch da Diu che survarga tutta capientscha, vegn a pertgirar vos cors e vos patratgs en Cristus Jesus.
