da Marcel Köhle
Filippi ei l’emprema cuminonza cristiana ell’Europa. Ella ei vegnida fundada da Paulus duront siu secund viadi da missiun (ca. 50 s. Cr.).
La lecziun da quella dumengia fa veseivel che Paulus veva ina relaziun fetg speciala cun quella cuminonza ed era fetg attaschaus als carstgauns ch’el ha entupau leu. El ei fetg engrazieivels che la lavur da sia missiun porta fretg ed encuraschescha els da crescher vinavon ella cardientscha ed ella carezia.
Quels plaids che Paulus drezza alla cuminonza da Filippi, pon era intimar nus da far partratgs davart nossa cardientscha. – Era nossa cardientscha ei vegnida «fundada» enzacu ed ei carschida. A tgi astgein nus esser engrazieivels? Nua stein nus oz cun nossa cardientscha? Nua pudein nus aunc «crescher» ella cardientscha e carezia? – Forsa dattan quellas damondas in pèr impuls per il temps d’advent e la preparaziun silla fiasta da Nadal.
Fil 1,4–6.8–11
Da tut temps, en mintga oraziun che jeu fetschel, roghel jeu cun plascher per vus tuts.
Jeu engraziel, perquei che vus veis priu part digl evangeli digl emprem di naven entochen ussa. Jeu hai ferma fidonza che quel che ha entschiet la buna ovra en vus, vegni era a cumplenir ella
tochen il di da Cristus Jesus.
Dieus ei mia perdetga, con fetg che jeu desidereschel vus tuts el cor da Cristus Jesus.
E quei roghel jeu: Che vossa carezia vegni pli e pli abundonta en enconuschientscha e tutta capientscha, sinaquei che vus saveies sedecider per quei che quenta veramein.
Lu vegnis vus ad esser schubers e senza menda pil di da Cristus, tgemblai cul fretg dalla giustia che deriva da Jesus Cristus per laud e gloria da Diu.
