da sur Marcus Flury
Tgi che Jesus ei, vegn descret sin differentas modas e manieras. Els evangelis vegn el denter auter presentaus a nus sco pastur, sco miedi, sco mussader e.a.v. Ella brev als Hebrès vegn plidau dad el sco premsacerdot ch’enconuscha la sort humana. El ha buca stuiu far unfrendas pil pievel, mobein ei sez s’unfrius per nus. Sco ver carstgaun e Diu sa el sco premsacerdot esser mediatur denter Diu e carstgaun.
Heb 4,14–16
Mes cars! Damai che nus vein in grond premsacerdot che ha penetrau ils tschiels, Jesus, il fegl da Diu, sche lein nus tener ferm il confess da cardientscha. Nus vein gie buc in premsacerdot che
savess buca ver cumpassiun cun nossas fleivlezias, mobein in ch’ei en tuts graus vegnius tentaus semegliontamein sco nus, cun excepziun dil puccau.
Lein perquei s’approximar cun ferma fidonza al tron da grazia, sinaquei che nus contonscheien misericordia ed anfleien grazia pigl agid a dretg temps.
☛ 1. lecziun dalla dumengia: Jes 53,10–11
☛ evangeli dalla dumengia: Mc 10,35–45
