da Maria Cristina Derungs-Bartolomei
Era en quei secund schatg ord sia brev metta sogn Giachen en ferm e stretg connex la relaziun cun Diu, cun quei ch’ei «ault» e s’auda alla dimensiun celestiala, e la relaziun cun quei che s’auda alla dimensiun terrestra. Contemplar en cardientscha la «gloria» de Cristus secomprova sco autentic ella relaziun culs concarstgauns. E quei en ina dimensiun fetg concreta, che pertucca las condiziuns realas e differentas denter ils carstgauns.
Las differenzas vegnan buca ignoradas, mobein renconuschidas. Mo che la moda de semetter en relaziun cun ellas vegn messa sutsura, grad sco ins legia el Priedi sil cuolm, la «Magna Charta», la lescha fundamentala, dil reginavel de Diu; sco Maria conta el Magnificat e sco Papa Francestg vegn buca staunchels de repeter.
Ils «davos», il paupers, ils disavantagiai en quest mund ein per Diu ils privilegiai; els quentan buca cun lur atgnas forzas, mobein spetgan tut da Diu, pil qual els han en fidonza in cor aviert. En nossas reuniuns succeda zuar buca en moda eclatanta quei che la lecziun descriva. «Dieus mira buca silla persuna» (Fatgs 10,34). El mira sin tgi che pratichescha la giustia e careza siu frar (1 Gion 3,10). Contas gadas perencunter, schizun ella Baselgia, differenziein nus tgi che mereta nies risguard e tgi buc, sin fundament de quei che «tarlischa» ed ei ferm el mund.
Gc 2,1–5
Mes frars, manteni la cardientscha enten Jesus Cristus, nies Signur dalla gloria, libra da tuts risguards sin persunas!
Sch’ei entra per exempel en vossa raspada in um cun anials dad aur e cun in bellezia vestgiu e sch’ei vegn era in pauper en vestgiu penderliu, e vus mireis sin quel che porta il vestgiu custeivel e scheis ad el:
Ti, sesa cheu en quei bien plaz! mo al pauper scheis vus: Ti sas star leu sin peis! ni: Sesa cheu giudapeis a mi! – promovis vus lu buca la discriminaziun en vies miez e daventeis derschaders cun nauschas intenziuns?
Tedlei, mes cars frars! Ha Dieus buca eligiu ils paupers el mund per far daventar els rehs tras la cardientscha ed artavels dil reginavel ch’el ha empermess a quels che carezan el?
