da Maria Cristina Derungs-Bartolomei
Cun questa dumengia entscheiva la lectura della brev de «sogn Giachen»: forsa il tierparents de Jesus, il «frar» dil Segner che haveva ina rolla impurtonta ella cuminonza de Jerusalem, forsa igl apiestel Giachen, forsa in discipel de Giachen. La lecziun metta oravontut peisa sil tema dil plaid de Diu, il plaid «della verdad», il plaid ver e pussent.
Sco ins legia el raquent della scaffiziun, egl emprem cudisch de Moses, ed el prolog digl evangeli tenor Gion, tut daventa tras il Plaid, il Vierv de Diu. Quei plaid ha schendrau nus; buca mo sco in camond extern, mobein cun vegnir «plantaus» en nus. Nus essan ina teila tessida ord il Plaid. Quei Plaid vul daventar carn era en nus, daventar veta vivida, ovras che corrispundan alla veta ed intenziun profunda, gie alla substanza dil Plaid, ch’ei la carezia.
Cheu vegn la brev de sogn Giachen fetg concreta. Far viver en nus il Plaid serealisescha entras la carezia proximala, oravontut enviers ils pli sbittai, fleivels e tribulai, sco orfans, vieuas, oz sco allura aunc enviers jasters e fugitivs che Leviticus prescriva de carezar sco sesez. Aschia sepertgir’ins dal vezi dil qual tut ils auters ein paupers fretgs: Il tschiec e suord egoissem, il viver mo per sesez. Entras la carezia proximala viva il Plaid en nus e sa plidar ed agir vinavon tras nus ella historia dil mund.
Gc 1,17–18.21b–22.27
Mes cars! Mintga bien dun e mintga regal perfetg vegnan da surengiu, derivan dil Bab dallas glischs, tier il qual ei dat ni midadas ni l’umbriva da variabladad.
Da libra voluntad ha el schendrau nus tras il plaid dalla verdad, per che nus seigien sco igl emprem fretg denter sias creatiras.
Acceptei da buna veglia il plaid ch’ei plantaus en vus e che ha la pussonza da spindrar vossas olmas. Realisei il plaid tras ovras e buca seigies mo auditurs ch’engonan sesezs.
In survetsch schuber e senza macla avon Diu il Bab consista en quei:
Visitar orfans e vieuas en lur tribulaziuns e sepertgirar nunmaculaus dils vezis mundans.
☛ 1. lecziun dalla dumengia: Dt 4,1–2.6–8
☛ evangeli dalla dumengia: Mc 7,1–8.14–15.21–23
