da Flurina Cavegn-Tomaschett
Biars lecturs e biaras lecturas scrolan propabel il tgau duront leger questa lecziun. Igl appel allas dunnas da sesuttametter a lur umens plaida encunter tutta capientscha contemporana arisguard l’egualitad denter um e dunna. Forzas reacziunaras dalla Baselgia serefereschan meinsvart sin quests plaids da Paulus per metter las «femnas sin pantun».
Che Paulus seigi igl autur dalla brev sto vegnir tschentau en damonda. E buca meins sto vegnir mess en damonda ina recepziun dils texts che risguarda buca ils fatgs entuorn la derivonza dil scriver.
La lecziun ei ina cumpart dallas tablas da casa resp. digl uorden da casa che han igl intent da reglar la convivenza denter ils carstgauns che vivan dil temps dall’antica en in tenercasa: um e dunna, affons e sclavs. Igl usit da gliez temps, che la dunna duei sesuttametter agl um, ei surprida digl autur. Nunusitada ei denton l’admoniziun als umens, da carezar lur dunnas. E quei ligiom da carezia cumpareglia el cul ligiom da carezia denter il carstgaun che fuorma la Baselgia e Cristus.
Ef 5,21–32
Mes cars! Sesuttamettei in a l’auter en cumineivel respect enviers Cristus! Las dunnas duein sesuttametter a lur umens sco al Segner; pertgei igl um ei il tgau dalla femna, sco Cristus ei il tgau dalla Baselgia, el il Salvader da quei tgierp.
Mo sco la Baselgia ei suttamessa a Cristus, aschia duein era las dunnas sesuttametter als umens en tuts graus.
Vus umens, carezei vossas dunnas, sco era Cristus ha carezau la Baselgia ed ei sesacrificaus per ella, per purificar e sanctificar ella cul bogn dall’aua e tras il plaid. Aschia vul el far cumparer la Baselgia avon sesez en tutta splendur, senza maclas, rubaglias ni autras mendas, mobein sontga ed immaculada duei ella esser.
☛ 1. lecziun dalla dumengia: Jos 24,1–2a.15–17.18b
☛ evangeli dalla dumengia: Gn 6,60–69
