da Flurina Cavegn-Tomaschett
Era quella dumengia legin resp. udin nus diversas admoniziuns per nossa via dalla veta. Las admoniziuns screttas allas cartentas ed als cartents dad Efesus san senz’auter era valer per nus, en nies temps ed en nies spazi da viver. Igl esser sin via a moda prudenta ed il metter las dretgas prioritads el senn da Diu, ein tuttavia era buns impuls per oz. E la fontauna da forza per quei viadi duei buc esser il vin, mobein il Sogn Spert.
Aunc ina caussa para a mi impurtonta. Nus essan envidai dad ir nossa via dalla veta cun ina tenuta da legria ed engrazieivladad. La tenuta da legria selai magari buca sfurzar, igl esser engrazieivels ei denton pusseivels a mintgin ed a mintgina.
Ef 5,15–20
Mirei bein, mes frars, co vus viandeis, buca sco malprudents, mobein sco sabis. Targei a nez il temps, pertgei ils dis ein schliats. Perquei seigies buca malprudents, mobein emprendei d’enconuscher tgei ch’ei la voluntad dil Segner. Buca sebuentei cun vin, pertgei quei schendra lischadadad; seschei plitost emplenir dil Spert.
Schei resunar en vies miez psalms, himnis e cants spirituals, cantei e giubilei en vos cors al Segner! Sespruei adina d’engraziar a Diu, il Bab da tuttas caussas, el num da Niessegner Jesus Cristus!
