da Flurina Cavegn-Tomaschett
La brev alla cuminonza dad Efesus vul dar ina nova direcziun alla via dalla veta. En la passascha da questa dumengia survegnan las cartentas ed ils cartents tips fetg concrets per ir quella via, sco p. ex. untgir engurgnientscha ni perdunar in a l’auter. Las admoniziuns duein survir ad ina buna convivenza.
La brev regorda era all’entschatta dalla via, numnadamein al mument dil batten. Il sigil dil batten ei schidadir il muossavia che indichescha la via al spindrament. E Jesus ei quel ch’ei ius ordavon la via che las cartentas ed ils cartents, pia era nus, duein suandar ed imitar.
Ef 4,30–5,2
Buca cuntristei il Spert sogn da Diu, cul qual vus essas vegni sigillai pil di dil spindrament. Bandischei ord vies miez scadina engurgnientscha, indignaziun e gretta, tuttas segridas ed insultas
ensemen cun tutta nauschadad.
Seigies buntadeivels e misericordeivels in viers l’auter, perdunei bugen in a l’auter, sco era Dieus ha perdunau a vus tras Cristus.
Seigies imitaders da Diu sco ses affons carezai; e viandei ella carezia, sco era Cristus ha carezau vus ed ei sesacrificaus a Diu sco dun d’unfrenda, sco sacrifeci d’emperneivla odur.
