da Marcel Köhle
La situaziun ella cuminonza dad Efesus era spanegiada sco la lecziun da questa dumengia tradescha. Sco ei para, ha ei dau grondas carplinas pertuccont la damonda tgi che seigi pli damaneivel a Cristus. – Certins dalla cuminonza eran dil meini ch’ils Gedius seigien pli damaneivels a Cristus ch’ils pagauns, perquei ch’els cartevan gia avon e vevan aschia in ligiom cun Diu.
Mo igl autur dalla brev insista fermamein ch’ei detti en Cristus negina differenza pli denter Gedius e pagauns. Jesus seigi vegnius per omisdus ed hagi purtau pasch a tuts, tuttina sch’els eran avon cartents ni buca.
E quella perschuasiun astga era ozildi esser confiert: En Cristus vegn schenghegiau pasch a nus e nus tuts essan tuttina damaneivel ad el, tuttina tgei provegnientscha che nus vein!
Ef 2,13–18
Vus che fuvas inaga dalunsch essas ussa vegni damaneivel enten Cristus Jesus, numnadamein tras siu saung. Pertgei el ei nossa pasch. El ha reuniu Gedius e pagauns ad in pievel ed ha disfatg en sia carn la seiv che sparta els, l’inimicezia.
El ha annullau la lescha cun ses camonds e sias prescripziuns, per crear tras sesez ord quels dus in sulet carstgaun niev, per far aschia pasch e reconciliar domisdus tras la crusch cun Diu en in sulet tgierp. En sia persuna ha el mazzau l’inimicezia.
El ei vegnius ad annunziar: Pasch a vus, ils dalunsch, e pasch a quels ch’ein damaneivel. Tras el vein nus domisdus el medem Spert liber access tier il Bab.
