da Marcel Köhle
All’entschatta dalla brev als fideivels dad Efesus ch’ei vegnida scretta entuorn igl onn 63 s. Cr., stat in laud festiv al Diu trinitar che nus udin sco lecziun da questa dumengia.
En in lungatg fetg solemn lauda igl autur pliras gadas Diu perquei ch’el ha predestinau ed eligiu nus carstgauns. Ord spira carezia ha Dieus creau nus e perquei astgein nus era sesentir benedi.
Che Dieus less era dir dil bien (bene-dire) a nus, muossa igl autur era en siu laud enviers Jesus. Grazia ad el, sias ovras e siu evangeli vein nus survegniu da Diu in mussament: Nus essan carezai, nus essan ses affons ed artavels, ed el schenghegia a nus spindrament. Quei ei nossa benedicziun.
La benedicziun stat empau sco in «motto» all’entschatta da quella brev. Duess la benedicziun era star empau sco in «motto» all’entschatta da tut nies far e demanar?
Ef 1,3–14
Benedius seigi Dieus, il Bab da Niessegner Jesus Cristus, il qual ha benediu nus tras Cristus cun tutta benedicziun spirituala ch’ei dat en tschiel. En Cristus ha el eligiu nus avon la creaziun dil mund, per che nus seigien sogns e senza macla avon sia fatscha.
Ord carezia ha el predestinau nus da daventar ses affons tras Jesus Cristus, tenor il beinplascher da sia voluntad, per laud e gloria da sia grazia.
Quella ha el regalau a nus tras siu Fegl carezau; tras siu saung vein nus il spindrament, il perdunament dils puccaus, tenor la rihezia da sia grazia.
Tras quella ha el tgemblau nus cun tutta sabientscha ed enconuschientscha.
El ha fatg da saver a nus il misteri da sia voluntad, sia beinvulenta intenziun fixada gia ordavon, per realisar ella cu il temps ei secumplenius: Rimnar tuttas caussas en Cristus sut in sulet tgau, quellas en tschiel e quellas sin tiara.
[Tras el essan nus predestinai e tschentai sco artavels tenor il plan da quel che realisescha tut sco el ha decidiu en sia voluntad.
Nus che vein gia pli baul sperau enten Cristus essan clamai da render laud a sia gloria.
Tras el veis era vus udiu il plaid da verdad, igl evangeli da vies spindrament; e suenter esser daventai cartents, veis vus retschiert il sigil dil Spert sogn ch’era empermess.
Il Spert ei il pègn che nus vegnin a retscheiver, nossa ierta, il spindrament che fa daventar nus proprietad da Diu, per laud ed honur da sia gloria.]
