dad Andri Casanova
Paulus preveda da rimnar daners en favur dalla cuminonza a Jerusalem. Quella collecta ed ovra da carezia annunzia el en sia brev als fideivels da Corint. El illustrescha la muntada da parter l’atgna rihezia cun far allusiun a Jesus Cristus che ha vuliu desister da sia rihezia en favur da nus carstgauns. Secapescha eis ei inaga ina rihezia materiala da daners ed inaga ina rihezia spirtala.
Finamira ei da ver ina fidonza en Diu che nus vein la finala tuts avunda. Perquei numna el alla fin era la situaziun dils Israelits el desiert: Els rimnavan mintga damaun manna, ed alla fin veva mintgin ton sco el duvrava (cf. Ex 16,18). Quella fidonza egl agid divin gida a parter a moda raschuneivla: Purtar levgera als auters, denton senza caschunar miseria a nusezs (cf. 2 Cor 8,13).
2 Cor 8,7.9.13–15
Mes cars! Vus essas pilver splendids en tuts graus: En cardientscha, el plaid, ell’enconuschientscha, egl anim grond, ella carezia vicendeivla da nus tier vus. Seigies perquei era generus en questa ovra da carezia. Pertgei vus enconuscheis la generusadad da Niessegner Jesus Cristus: Schegie ch’el era rehs, eis el daventaus paupers per amur da vus, sinaquei che vus daventeies rehs tras sia paupradad.
Ei setracta gie buca da purtar als auters levgera cun caschunar a vus miseria; nus encurin mo ina ulivaziun. El temps present duei vossa abundonza purtar agid a lur basegns, sinaquei che lur abundonza surveschi in di a vossa munconza, e ch’ei detti cheutras ina ulivaziun, sco quei ch’ei stat scret: Quel che veva rimnau bia, veva buca da memia, e quel che veva rimnau pauc, veva buca munconza.
☛ 1. lecziun dalla dumengia: Sab 1,13–15; 2,23–24
☛ evangeli dalla dumengia: Mc 5,21–43
