dad Andri Casanova
Ils plaids da Paulus als fideivels da Corint lain sminar che nus essan jasters cheu sin tiara e che nossa vera patria ei en tschiel tier il Bab. Quei para denton mo ina part dil messadi.
Bein vein nus ina ferma empermischun che lai semiar nus dil tschiel, mo per Paulus ha il tschiel duas dimensiuns. Dad ina vart secapescha la veta perpetna suenter la mort, da l’autra vart savein nus gia ver en quest mund in schatg dil tschiel. Paulus sez ei perdetga da quei schatg ch’el ha giu entras sia conversiun. E quella ha midau sia veta cumpletamein. En quei senn munta il «bandunar il tgierp» buca mo il passadi en l’auter mund, mobein era ina profunda uniun cun Cristus, aschi profund ch’ins ei sco nievnaschius.
2 Cor 5,6–10
Mes cars! Nus vein adina buna speronza e savein: Aschiditg che nus essan da casa el tgierp, vivin nus egl jester, lontan dil Segner; pertgei nus viandein aunc en cardientscha e buc ella visiun.
Nus essan pia plein speronza e preferin plitost da bandunar il tgierp per esser da casa tier il Segner. Perquei sedein nus tutta breigia da plascher ad el, seigi che nus resteien el tgierp ni che nus banduneien quel.
Nus tuts vein gie da cumparer avon il tribunal da Cristus, sinaquei che scadin retscheivi la pagaglia tenor quei ch’el ha fatg duront sia veta, seigi dil bien ni dil mal.
