dad Andri Casanova
Paulus scriva als fideivels da Corint davart sia cardientscha alla levada. Quei ei sia (e nossa) pli gronda speronza e perschuasiun: Nus vegnin leventai cun Cristus Jesus. Per el ei quella gloria che spetga nus tier Diu Bab da tala dimensiun e muntada ch’ella lai bunamein emblidar il terrester e quotidian.
Quella tenuta da Paulus po magari dar l’impressiun d’in fantast ch’ei cun siu patratg e dafar gia en l’auter mund. Segir sa era Paulus che nus essan naschi en quei mund e che nus vein cheu ina missiun. Mo en siu scriver dad oz dat el a nus dus tips: Dad ina vart cusseglia el da relativar empauet ils quitaus mundans e veser quels sco scola per la veta eterna. E da l’autra vart fa el endamen che quella gloria ei buc mo empermessa mo a mi, mobein era als auters. Quei fa daventar nus megliers frars e soras, ina famiglia dil medem Spert da cardientscha.
2 Cor 4,13–5,1
Mes cars! Damai che nus possedein il medem Spert da cardientscha, tenor quei che stat scret: Jeu hai cartiu, perquei hai jeu plidau, sche cartein era nus, e perquei plidein nus era. Nus essan perschuadi che quel che ha leventau il Segner Jesus, vegn era a leventar nus cun Jesus e tschentar nus avon sia fatscha ensemen cun vus.
Mo tut quei daventa pervia da vus, sinaquei che la grazia ch’ei abundonta, daventi surabundonta tras igl engraziament d’in diember adina pli grond, per la gloria da Diu.
Perquei seschein nus buca stermentar. Il cuntrari, malgrad che nies carstgaun extern vegn destruius, serenovescha nies carstgaun intern tonaton di per di. Pertgei il lev buordi da nossa tribulaziun momentana vegn a procurar a nus cun immensa surmesira ina eterna rihezia da gloria. E nus mirein gie buca sil veseivel, mobein essan spanegiai sil nunveseivel. Pertgei las caussas veseivlas cuozan in temps, las nunveseivlas denton restan per adina. Nus savein pilver: Inaga che la tenda da nossa dimora sin tiara ei disfatga, vein nus ina casa preparada da Diu, ina avdonza eterna en tschiel ch’ei buca fatga cun mauns da carstgauns.
