dad Andri Casanova
Enconuschentamein ei Paulus, igl autur dallas brevs als fideivels da Corint, seconvertius tier Cristus a moda tut anetga e cun ina certa radicalitad. Avon sia conversiun persequitava els ils emprems cristians ed suenter ha el fatg immens viadis per stabilir numerusas cuminonzas cristianas. Ina da quellas cuminonzas era a Corint, la capitala d’ina provinzia greca digl Imperi roman.
Igl extract ord sia brev a quels da Corint drova Paulus numerus cuntrasts che muossan la profunda muntada digl esser cristian: la stgiradetga e l’illuminaziun (dil batten), il scazi (cuzzeivel) ed il vischi (rumpeivel), las tribulaziuns ed ina sort libertad, la persecuziun senza esser bandunai. Gie, Paulus vesa schizun che nossa veta s’unescha cun la veta, mort e levada da Cristus. Era sche nus sesentin falombers e pigns, eis ei regalau a nus in immens scazi divin plein forza e glischur.
2 Cor 4,6–11
Mes cars! Il Diu che ha detg: Ord la stgiradetgna duei resplender la glisch, quel ha era sclariu en nos cors, per che nus vegnîen illuminai tras l’enconuschientscha dalla gloria da Diu che tarlischa en fatscha a Cristus. Quei scazi purtein nus denton en sempla vischala d’arschella, sinaquei che la pussonza ordvart gronda seigi d’attribuir a Diu e derivi buca da nus.
Nus essan tribulai da tuttas varts e tonaton buca catschai a cantun. Nus savein strusch nua sevolver, e nus sedesperein buc. Nus essan persequitai, mo buca bandunai, essan sdernai per tiara, mo buca mess a frusta.
Da tut temps purtein nus vid nies tgierp il pitir e murir da Cristus, sinaquei ch’era la veta da Jesus semuossi vid nies tgierp. Pertgei ferton che nus vivin, vegnin nus adina puspei surdai alla mort pervia da Jesus, sinaquei ch’era la veta da Jesus semuossi en nossa carn mortala.
