dad Andri Casanova
La religiun gediua era tochen tier la destrucziun dil tempel egl onn 70 suenter Cristus concentrada fermamein sil tempel a Jerusalem. Quei era il liug central che purscheva access a Diu ed oravontut remischun dils puccaus. Suenter la destrucziun han ils Gedius stuiu anflar autras fuormas da cult ed oraziun.
La brev als Hebrès porscha als emprems Cristians ina alternativa. Ella numna Jesus Cristus «in misericordeivel e fideivel premsacerdot» (Heb 2,17). En el ei igl access a Diu garantius vinavon per adina. Sper quei aspect divin muossa il suandont extract ord la brev era la dimensiun fetg humana da Jesus. El ei staus carstgaun. El sa tgei che larmas ein, tgei che pitir munta. Ed el sa era, tgei ch’ei munta dad emprender enzatgei e far in process. El enconuscha il nies.
Heb 5,7–9
Ils dis da sia veta terrestra ha Cristus purtau cun ferm clamar e cun larmas oraziuns e supplicas avon quel che pudeva spindrar el dalla mort, ed el ei vegnius exudius muort sia pietad.
Schegie ch’el era Fegl, ha el tras quei ch’el ha pitiu empriu d’obedir.
Arrivaus alla perfecziun, eis el daventaus igl autur dil salit perpeten per tut quels che obedeschan ad el.
☛ 1. lecziun dalla dumengia: Jer 31,31–34
☛ evangeli dalla dumengia: Gn 12,20–33
