dad Andri Casanova
Neu dil Veder Testament ei l’expressiun enconuschenta: Il Segner, in Diu grazius e plein misericordia, pazients e rehs da fei e buontad (mira Ex 34,6 ed auters loghens). La brev a quels dad Efesus pren quei maletg e scriva vinavon el en vesta alla mort e levada da Cristus.
Dad ina vart vegn fatg attent che quella misericordia e buontad divina semanifestescha era en Cristus Jesus. Ch’el seigi Fegl dil Bab e persuna divina era da quei temps aunc buc exprimiu a moda schi explizita.
Da l’autra vart – e quei a consequenzas per quels che suondan Cristus – ein tut ils fideivels uni en Cristus. Quei era da gliez temps Gedius e Grecs ed auters. Quella uniun cun Cristus el senn dad esser scaffi en el, munta spindrament e levada per nus. Quei ei buc en emprema lingia enzatgei ch’igl ei da contonscher, mobein enzatgei ch’ei dau a nus. In regal divin, in regal che po era far nus semeglionts a Diu.
Ef 2,4–10
Dieus ei rehs da misericordia. Tras sia gronda carezia, cun la quala el ha carezau nus, ha el vivificau nus ensemen cun Cristus, nus ch’eran morts tras nos falliments.
Tras grazia essas vus spindrai.
El ha leventau nus cun Cristus Jesus e dau a nus cun el in tron en tschiel.
Cheutras ha el mussau a tut ils temps digl avegnir l’immensa rihezia da sia grazia tras sia buontad viers nus en Cristus Jesus.
Pertgei tras la grazia essas vus spindrai sin fundament dalla cardientscha; e quei deriva buca da vus, mobein ei in regal da Diu. Quei dependa era buca dad ovras, sinaquei che negin sappi
segloriar.
Nus essan gie sias creatiras, scaffi en Cristus Jesus cun la finamira da far bunas ovras. E quellas ha Dieus preparau ordavon per nus, sinaquei che nus realiseien ellas.
☛ 1. lecziun dalla dumengia: 2 Cr 36,14–16.19–23
☛ evangeli dalla dumengia: Gn 3,14–21
