dad Andri Casanova
Ina lecziun plein damondas spetga oz nus. Mo quellas damondas dalla brev da Paulus als Romans cuntegnan el medem mument rispostas e teologia. Las empremas damondas gidan a smarvigliar davart quei ch’ei capitau: Dieus ha dau vi siu agen fegl, e quei per amur da nus! Per Paulus ei quei motiv da smarvegl e da giubel. Con fetg po Dieus carezar nus!
Quei munta lu era che nus stuein tuttavia buc ver tema da dertgiras. Nus vein Diu da nossa vart, el che giustifichescha, e nus vein Cristus da nossa vart, el che ha victorisau il puccau e la mort, el ch’interceda per nus. Pia, senza vuler snegar ni relativar il mal, nus astgein selegrar ed ir agradsi.
Ro 8,31b–34
Sche Dieus ei per nus, tgi vul lu esser encunter nus?
El che ha buca schanegiau siu agen Fegl, mobein dau vi quel per nus tuts, co duess el buca regalar scadina favur a nus cun el ensemen?
Tgi vul purtar plogn encunter ils eligi da Diu? Dieus ei gie quel che giustificheschaGiustificar munta che la relaziun denter Diu e carstgaun vegn
privada dil disturbi dil puccau.!
Tgi vul pia condemnar? Forsa Cristus Jesus, quel ch’ei morts, ni meglier detg leventaus? Na, el sesa da vart dretga da Diu ed interceda per nus.
☛ 1. lecziun dalla dumengia: Gen 22,1–2.9a.10–13.15–18
☛ evangeli dalla dumengia: Mc 9,2–10
