dad Andri Casanova
L’emprema brev da Pieder argumentescha cheu che las attaccas sils emprems cristians ein buc adumbatten e ch’ellas ein ina perdetga che munta spindrament. Ella fa denter auter diever da dus fetg vegls maletgs da Pastgas.
Igl emprem maletg ha lu pli tard survegniu in plaz ella cardientscha, nua ch’ei ha num che Jesus seigi ius «giu enten ils uffiarns». Pieder descriva pia ch’el seigi staus denter mort e levada el mund dils morts – el scheol – ed ha annunziau leu igl evangeli. Ellas baselgias orientals vesan ins perquei savens co Cristus vegn neuasi dils uffiarns culs carstgauns dalla generaziuns avon el, cun Eva ed Adam. Quei ei Pastgas.
Quellas Pastgas capetan el secund maletg era tier nus battegiai. L’arca da Noa ei stada il liug da spindrament, aschia sco il batten ei oz liug da spindrament che regala a nus ina ligia perpetna cun Diu.
1 Pd 3,18–22
Cristus ei morts ina gada pervia dils puccaus, il gest pils malgests, per menar vus tier Diu. Tenor la carn eis el vegnius mess alla mort, mo tenor il spért eis el vegnius leventaus en veta.
Aschia eis el era ius tier ils spérts ch’eran en perschun ed ha perdegau ad els. Quels ein stai pli baul malobedeivels, cu Dieus spitgava cun gronda pazienzia ils dis da Noe, ferton che l’arca vegneva construida. En quella ein mo paucs, numnadamein otg persunas, vegni spindrai ord l’aua.
Quei ei stau ina semeglia pil batten che spendra ussa vus. E quel munta buca mo in lavar naven il tschuf dil tgierp, mobein ei ina supplica tier Diu per ina buna cunscienzia tras la levada da Cristus. Quel ei da vart dretga da Diu dapi sia ascensiun en tschiel, e suenter ch’ils aunghels, principats e pussonzas ein suttamess ad el.
☛ 1. lecziun dalla dumengia: Gen 9,8–15
☛ evangeli dalla dumengia: Mc 1,12–15
