Dt 18,15–20
Moses ha plidau cul pievel schend: In profet sco mei vegn il Segner tiu Diu a leventar ord tiu miez – ordenter tes frars – quel dueis vus tedlar, gest sco ti has rugau il Segner tiu Diu sil Horeb il di dalla radunonza schend: Jeu vi buca tedlar pli la vusch dil Segner miu Diu e buca veser pli quei fiug stermentus, per che jeu stoppi buca murir. Lu ha il Segner detg a mi: Els han buna raschun cun lur plidar. In profet sco tei vi jeu leventar ad els ordamiez lur frars e vi metter mes plaids en bucca ad el, ed el duei far da saver ad els tut quei che jeu vegn a cumandar ad el. Tgi che teidla buca mes plaids ch’el fa da saver en miu num, quel vi jeu mez castigiar persuenter. Mo sch’in profet selubescha da far da saver enzatgei en miu num che jeu hai buca cumandau ad el da dir, ni sch’el plaida el num dad auters dieus, sche duei in tal profet murir.
