dad Andri Casanova
Lein s’imaginar che nossas tattas e nos tats ein vegni bandischai da lur patria. Els – che vivan buca pli – raquintavan adina puspei da quella patria e digl impressiunont tempel. Ed ussa suenter quei temps egl exil astgein nus turnar en lur e nossa patria. Tgei legria! Denton stuein nus constatar ch’il tempel stat buca pli e che nus essan daventai jasters en l’atgna tiara.
Quei patratg po forsa era secunfar cun nossa(s) baselgia(s). Nos perdavons vevan aunc in cert quet per la baselgia, mo oz para tut dad esser disfatg e «tschuffergnau». En quei mument astgein nus s’unir cun la lecziun ed oraziun ch’ei gest per quella situaziun. Remarcabel ei ch’els glorificheschan buc il vargau. Anzi, els seregordan digl essenzial dalla religiun: Nies Diu ei nies Salvader! Ed a quei Diu semettan els a disposiziun cun tgierp ed olma per ereger da niev il tempel.
Jes 63,16b–17.19b; 64,3–7
Ti Segner, ti eis nies bab,
«nies Salvader», quei ei tiu num da perpeten enneu.
Pertgei has ti, Segner, schau untgir nus da tia via,
schau esser nies cor stinaus enviers tia tema?
Sevolva puspei per amur da tes survients,
per amur dalla schlatta da tia ierta.
Sche mo ti lesses scarpar dapart il tschiel e vegnir neuagiu –
avon tia fatscha vegnan ils cuolms a tremblar!
Da perpeten enneu han ins mai udiu;
buc in’ureglia che ha udiu,
e buc in egl che ha viu
in Diu, auter che ti, che fa aschia
cun tgi che sefida dad el.
Ti miras sin quels che ein gests
e che seregordan da tias vias.
Mo uarda, uss eis ti vilaus,
e nus vein falliu enviers tei,
da perpeten enneu, ed essan plein rebelliun.
Nus tuts essan daventai sco il malmund,
tut nossa giustia ei sc’in lenziel tschuffergnau.
Nus tuts vegnin pass sco la feglia,
e nos malfatgs sufflan naven nus sco il vent.
Negin eis ei ch’invochescha tiu num,
negin che sesaulza per setener vida tei.
Ti has gie zuppau tia fatscha da nus
e surschau nus a nos puccaus.
Mo ussa, Segner, eis ti nies bab,
nus essan arschella, ti eis nies formader,
l’ovra da tes mauns essan nus tuts.
