dad Ursicin G. G. Derungs
L’emprema lecziun della dumengia de Cristus Retg mass meglier a prau cun l’idea dil bien pastur. Denton tut ils tetels attribui a Cristus e bia ga pri ord il Veder Testament van in en l’auter, secumpleteschan, e «lain dar la colur» vicendeivlamein. Il retg survegn è la colur dil pastur; el ha è dad esser in bien pastur. Prendend la colur dil pastur survegn il retg cheutras in accent pli humiliteivel. Silmeins tenor nies sentir. In accent che stat denton fetg bein a Jesus de Nazaret.
Jesus ei in retg che s’impona buc, cu el entaupa il giuven reh che vul daventar siu giuvnal, mo vul buca renunziar a sias rihezias (Mc 10,17–27). Jesus ei è in retg che s’oppona buc. El center dil priedi sil cuolm di Jesus: «Buca fagei resistenza al mal! Il cuntrari, sch’enzatgi dat a ti sin la vesta dretga, tegn vi era l’autra» (Mt 5,39). Ual quei ha el fatg suenter siu arrest; el ei vegnius blasmaus ed ha priu slaffadas dretg e seniester. Quei renunziar, buca s’opponer ha purtau ad el ina cruna de spinas, beffa per ina regalitad mundana. Mo la renunzia da s’opponer ha fatg plaz, ha fatg vegnir alla glisch la forza de sia veta e de sia regalitad. Quei ei la levada da Pastgas, che ses derschaders han buca capiu e che las guardias alla fossa han munchentau, perquei ch’ellas durmevan. La regalitad de Jesus, beffegiada cun la cruna de spinas, semuossa è en sia «diaconia», cu el lava ils peis a ses apostels.
Ez 34,11–12.15–17
Aschia plaida Dieus il Segner: Uarda, jeu mez vi encurir mias nuorsas e ver quitau dad ellas. Sco in pastur ha quitau da sia muntanera stond enamiez sias nuorsas spatitschadas, aschia vi jeu ver quitau da mias nuorsas.
Jeu vi menar anavos ellas da tut ils loghens, nua ch’ellas eran sespatitschadas il di brut e stgir. Jeu mez vi pascular mias nuorsas, jeu mez vi schar ruassar ellas – sentenzia da Diu il Segner. Quei ch’ei iu a piarder vi jeu encurir, quei ch’ei spatitschau far turnar anavos, quei ch’ei vulnerau enfaschar; jeu vi dar forza a quei ch’ei fleivel e vegliar sur da quei ch’ei grass e ferm. Jeu vi esser pastur sco quei ch’ei descha.
Quei che pertucca vus, mias nuorsas, plaida Dieus il Segner: Jeu vi derschar denter nuorsas e nuorsas, denter bucsIl plaid hebraic per nuorsas cumpeglia era las cauras. ed anugls.
