da sur Martin Bearth
Igl ei da smarvegliar che la sontga Scartira tschenta la dunna e sia lavur aschizun ella glisch. Ella lavura cun maun diligent vida launa e glin, mo ella arva era siu maun pil murdiu. Ins sa sedumandar, schebein nus anflein aunc ozildi, suenter varga 2000 onns, ton laud per la prestaziun dallas dunnas. Tenor ina statistica internaziunala vegn 70 procent da tutta lavur fatga da dunnas. Il gudogn finanzial denton orda tut quella lavur munta mo 10 procent. Lavur voluntaria, lavur el zuppau.
Quei text biblic para a mi dad esser sco in clom ed avis da dar dapli attenziun e dapli undrientscha a tut la lavur che las dunnas prestan, era ella Baselgia.
Prov 31,10–13.19–20.30–31
La dunna perfetga! – Tgi anfl’ina tala?
En valeta survarga ella lunsch las corallas.
Il cor da siu um ha fidonza dad ella,
e quei vegn ad esser mo siu avantatg.
Profit eis ella per el e maina da donn,
duront sia veta entira.
Ella eis ei ch’ha quitau da launa e glin
e lavura cun maun diligent.
Sia detta tscherca la ruccaTempradira per fixar la launa da filar.,
e siu maun enquera la roda.
Ell’arva siu maun pil murdiu,
e tonscha sia detta al pauper.
Cuglienem ei bellezia, vanadad l’eleganza,
mo la femna ch’ei sabia mereta undrientscha.
Dei ad ella dil fretg da ses mauns!
Sia lavur conta laud ad ella per l’escha.
