da Flurina Cavegn-Tomaschett
Il text dalla lecziun ei screts a Babel, pia egl exil. Il profet Jesaja plaida consolont cun il pievel d’Israel ch’ei deportaus. El declara ch’ei vegni a succeder enzatgei marveglius. Il retg dalla Persia Cirus, pia buc in Israelit, vegni a liberar il pievel d’Israel. Quei jester porta schizun il tetel da honur «igl unschiu», pia il messias. Quei ha probabel tunau ualti jester en las ureglias dils Israelits. Denton cun il plaid dil profet vegn detg ad els: Era sche quei retg ei dalla Persia, era sch’el sa buc enconuscher tgei che Dieus vul far cun siu pievel, vegn Dieus a spindrar ils Israelits entras el. Ed aschia succeda ei. Cirus conquista Babel e lubescha als Gedius da turnar a casa.
Jes 45,1.4–6
Aschia plaida il Segner cun siu unschiu CirusCirus ei il retg dalla Persia
ch’el ha priu pil maun
per sdernar avon el naziuns
e spogliar ils retgs da lur armas,
per arver ad el ils portals,
aschia che quels seigien buca serrai.
Per amur da Jacob, miu survient,
e da miu eligiu Israel,
hai jeu clamau tei per num
e nobilitau tei senza che ti enconuschies mei.
Jeu sun il Segner, ei dat buc in auter,
sper mei dat ei negin diu.
Jeu hai dau armas a ti
senza che ti enconuschies mei,
sinaquei ch’ins vegni pertscharts
naven dil levar dil sulegl entochen sia rendida
ch’ei exista nuot dasper mei.
Jeu sun il Segner, ei dat buc in auter.
