da ser Jan-Andrea Bernhard
Tgi ha aunc maina aviert ina finiastra? Mirond ord la finiastra vesein nus empau pli lunsch, ni enzatgei niev.
Il profet Jesaja arva era ina finiastra, per ils fideivels ni per quels ch’enqueran enzatgei dapli che quei ch’il mintgagi porscha. Ins vesa empau pli lunsch, gie ins vesa in cuolm, e sin quei cuolm s’entaupan pievels e naziuns, da tuttas sorts, ed ins gauda ina fiasta cun spisas grassas e vin vegl.
Entras quella finiastra vesein nus in’autra realitad che survarga nossa veta terrena – ins vesa pli lunsch, sur nossa mort ora, ella realitad celestiala.
E sch’ins mira pli prezis, gie sch’ins s’avischina a quella autra realitad, lu vesein nus: Niessegner, nies bien Deus, vegn a schigentar las larmas da scadina fatscha, ed el vegn a destruir la mort per adina.
Veramein! Quella finiastra che Jesaja arva per nus ei in cunfiert fetg profund buca mo en temps da malencurada, mobein era en temps da legria. Igl ei in «avongust» da quei che Deus vegn a preparar per nus. Nus astgein selegrar!
Jes 25,6–10a
Gliez di vegn il Segner dallas armadas
a preparar sin quei cuolm per tut ils pievels
ina fiasta da spisas grassas,
ina fiasta da vin vegl;
da spisas grassas cungidas cun maguol,
da vin vegl filtraus ina secunda ga.
El vegn a destruir sin quei cuolm
il vèl che cuarcla tut ils pievels
e la cozza ch’ei rasada sur tut las naziuns.
El vegn a destruir la mort per adina;
ed il Segner Diu vegn a schigentar
las larmas da scadina fatscha,
la zanur da siu pievel
vegn el ad allontanar dalla tiara entira.
Pertgei il Segner ha plidau.
Gliez di vegns ti a dir:
Uarda! Nies Diu che nus vein spitgau,
el dat a nus salvament!
Quei ei il Segner che nus vein spitgau,
lein giubilar e cantar pervia da siu salit.
Pertgei il maunIl maun munta era la pussonza. dil Segner
ruaussa sin quest cuolm.
