da sora Armina Maissen
Quella lecziun sveglia en mei sentiments da contradicziuns.
Il Segner surmeina il profet al bien e quei porta a lez pitgira e zanur. Il profet pitescha, gie grescha en sia situaziun. Mo tuttina, nuot sa sminuir siu desideri e sia segirtad. El sesenta totalmein en possess dil Segner. El sto capitular, setegn vid il bien e stat fideivels al Segner. El sa buca far auter. En siu intern brischa quei fiug che ha pli tard legrau e rinforzau ils giuvnals dad Emmaus. Quei numnel jeu «grazia».
Segner, mantegn en miu cor quei fiug che brischa per tei, sche mia cardientscha vegn messa ord tals motivs sin emprova. Mo ti enconuschas mei diltut, ed era quels che fan mal a mi. Lai rugar mei cun il psalmist: «Meina ti mia caussa, Segner» (tenor Ps 119,154).
Jer 20,7–9
Ti has surmenau mei, o Segner, e jeu hai schau surmenar. Cun forza has ti tschaffau mei ed has rimportau la victoria. Tut il di fan ei beffas da mei, scadin che sgomia mei. Sch’jeu plaidel, stoi jeu grir, stoi clamar: Violenza, malgiustia! Pertgei il plaid dil Segner ei per mei mo zanur e gomia tudi. Mo sch’jeu patratgel: Jeu vi buca seregurdar pli dad el, vi buca plidar pli en siu num, lu eis ei en mei sco fiug che brischa miu cor, che cua en mia ossa. Jeu pos buca supportar, jeu sun buc el cass.
