da Marcel Köhle
El temps dil retg Hiskija (725–697 a. Cr.) era Schebna il cau dil tempel. En quella funcziun occupava Schebna in fetg ault post alla cuort roiala a Jerusalem.
En la lecziun da questa dumengia udin nus ina dètga accusaziun ch’il profet Jesaja drezza a sia adressa e che pretenda la deposiziun da siu uffeci. La raschun persuenter savein nus leger els vers precedents (v. 15–16). Leu vegn descret che Schebna ei sefidaus memia fetg da sesez (e da sias forzas), enstagl da Diu: in cass classic da superbia e luschezia!
A siu successur Eljachim vegn surdau «la clav dalla casa da David». Il vers 22 – «Sch’el arva, lu sa negin serrar, e sch’el siara, lu sa negin arver» – regorda nus fetg al raquent biblic, nua che Jesus surdat la «pussonza dallas clavs» a Pieder.
In ault post (era ella Baselgia) sa ruinar il caracter. Perquei eis ei impurtont, aschia la lecziun da questa dumengia, dad esser humiliteivels e buca d’emblidar da tgi ch’ins ha survegniu la grazia per quei uffeci: numnadamein da Diu sez!
Jes 22,19–23
Aschia di il Segner a Schebna, il cau dil tempel: Jeu catschel tei naven da tiu post ed allontaneschel tei da tiu plaz.
Gliez di vegn ei a daventar che jeu clomel miu survient Eljachim, il fegl da Hilchija. Jeu vestgeschel el cun tiu manti ed orneschel el cun tia stola. Jeu surdun ad el tiu uffeci, ed el vegn ad esser in bab als avdonts da Jerusalem ed alla casa da Juda.
La clav dalla casa da David tschentel jeu silla schuiala ad el. Sch’el arva, lu sa negin serrar, e sch’el siara, lu sa negin arver.
Jeu catschel en el sco guota en in bien liug, ed el vegn ad esser in post d’honur per la casa da siu bab.
