da ser Jan-Andrea Bernhard
Ins sedamonda sch’ins legia la lecziun dad oz: Tgi ei il vegliuord? Tgei pussonza ha el ch’el sa tener dertgira? E tgi ei quel che cumpara sco in fegl da carstgaun?
En miu temps da studi ha in professer getg inagada: «Quella visiun rimna l’entira Bibla! Il bab, il fegl, la dertgira e l’adoraziun.» Jeu vaiel denton buca capiu propi. Oz, 30 onns pli tard, capeschel empau meglier. La dertgira sa sevolver all’adoraziun per quel che sefida a quel ch’ei «sco in fegl da carstgaun». Gest el Niev Testament vegn discurriu pliras gadas da quei «fegl da carstgaun» – eis ei il fegl da Diu, il fegl dil vegliuord?
Il pli vegl evangeli ei quel da Marcus. El entscheiva cul batten da Jesus. Tenor Marcus ei il fegl dil lennari Giusep, Jesus da Nazaret, vegnius adoptaus da Diu, a caschun dil batten. Jeu creigel ch’il profet Daniel ha raschun: Il «fegl da carstgaun» ei daventaus il fegl da Diu, da nies bien Bab, el ei vegnius adoptaus cunquei ch’el ei perfetgs, grazia a sia mumma, Nossadunna. Gie, forsa ha il professer tuttina raschun: «Quella visiun nocturna rimna l’entira Bibla!»
Dan 7,9–10.13–14
Jeu hai viu:
Ins eregia trons
ed in vegliuord pren plaz.
Siu vestgiu ei alvs sco la neiv,
ils cavels da siu tgau schubers sco launa;
siu tron ei fiug flammegiont
cun rodas da flommas ardentas.
Dad el sbucca lava buglienta;
mellis e mellis surveschan ad el,
roschadas immensas sepostan von el.
La dertgira entscheiva.
Ils cudischs vegnan aviarts.
E jeu hai viu en la visiun nocturna:
Uarda! Sils nibels dil tschiel
cumpara in sco in fegl da carstgaun.
Quel s’avonza tochen avon il vegliuord
e vegn menaus avon lez.
Ad el vegn surdau pussonza,
dignitad e domini.
Mintga pievel, naziun
e lungatg survescha ad el.
Sia pussonza ei pussonza perpetna
che maina va da rendiu;
siu domini ei domini etern
che vegn maina cassaus.
☛ evangeli dalla dumengia: Mt 17,1-9 (A)
