da sur Alfred Cavelti
Giavischs per il futur vein nus tuttas e tuts. Mo nus savein ch’els van buc adina en vigur sco nus desiderein.
Il retg Salomon ha giu la cuida che Dieus ha plidentau el en siemi e dau la pusseivladad ad el d’exprimer in giavisch. Tgei ei per el en quei mument d’impurtonza? Buca rihezia, victoria sur ses inimitgs, buc ina liunga veta! Salomon roga per in cor prudent ch’ei stgis d’ademplir sia missiun e differenziar il bien ed il mal. Cun auters plaids: El giavischa ina tenuta aviarta, sabia ed attenta, in fin sensori per la realitad. E quei giavisch anfla il beinplascher da Diu e vegn exudius.
Tgisa tgei che nus giavischassen, sche Dieus dess a nus quella pusseivladad?
1 Re 3,5.7–12
Lezs dis ei il Segner cumparius a Salomon da notg en in siemi. E Dieus di: Exprima in giavisch! Tgei duei jeu dar a ti?
E Salomon rispunda: Segner, miu Diu, ti has fatg daventar tiu survient retg enstagl da miu bab David. Mo jeu sun aunc in giuvenot e sai ni nua en ni nua ora. Ed ussa stat tiu survient enamiez tiu pievel che ti has eligiu, in pievel aschi grond, che negin sa dumbrar ni calcular sia biarezia. Sche veglies ti pia dar a tiu survient in cor prudent da reger tiu pievel e da differenziar quei ch’ei bien e mal; pertgei tgi duess schiglioc saver reger quest tiu pievel aschi numerus? Al Segner ha ei plaschiu che Salomon ha fatg ina tala supplica.
E Dieus di ad el: Damai che ti rogas per quei e rogas buca per ina liunga veta ni per rihezia ni per la mort da tes inimitgs, mo biaronz per capientscha d’entellir il retg, sche vi jeu far tenor tes plaids: Mira, jeu dun a ti in cor sabi e prudent, ch’igl ei maina stau avon tei in da tiu paregl e vegn suenter tei maina a dar in da tiu paregl.
