da Maria Cristina Derungs-Bartolomei
«Aschia plaida il Segner» – aschia plaida il profet, cu el pronunzia il Plaid de Diu. Il Segner plaida de Siu Plaid. Pertgei ei quei schi impurtont? Tgei ei in plaid? Buca mo in pèr tuns che dattan informaziuns. Plaid ei communicaziun de sesez, digl agen mund intern als auters. El Plaid communichescha Diu Sia veta a nus. L’autoritad dil profet ei il Plaid de Diu, e la forza de quei plaid descriva il tierz Jesaja cun maletgs fetg ferms e presents en scadina cultura, ton che negin sa ignorar quei: la plievgia che croda giu da tschiel, bogna la tiara, fa crescher il graun che dat paun e vivonda. Quei ei sia forza.
En quella lecziun vegn igl effect ni il resultat dil Plaid de Diu che croda sin tiara buca mess en damonda. Ins duess tener bein endamen quei, nus che essan pigns da cardientscha e resignein memia spert vesend la forza dil mal el mund.
Quella cardientscha senza dubis e senza targlinar dil tierz Jesaja, quella stuein nus emprender ed exercitar mintga di: cun fatscha sereina e plein fidonza era ella confruntaziun culs pigns e gronds mals quotidians.
Jes 55,10–11
Aschia plaida il Segner:
Sco la plievgia e la neiv crodan giu da tschiel e tuornan buca pli anavos, mobein bubrentan la tiara, fructificheschan e fan catschar ella, aschia ch’ella dat il sem da semnar ed il paun da magliar – aschia vegn ad esser miu plaid che sortescha da mia bucca. El tuorna buca cun nuot anavos tier mei, mobein fa quei che jeu vi ed exequescha quei che jeu hai tarmess el a far.
