Fatgs 8,5–8.14–17
Lezs dis ei Filip vegnius giu el marcau principal dalla Samaria ed ha perdegau leu il Cristus. Tut il pievel tedlava cun attenziun ils plaids da Filip, vesend las miraclas ch’el fageva. Pertgei orda bia malspirtai sortevan ils spérts malmunds grend e burlend; era bia schirai e struptgai vegnevan medegai. E gronda legria ei serasada en gliez marcau.
Cura ch’ils apostels a Jerusalem han udiu che Samaria hagi acceptau il plaid da Diu, han ei tarmess Pieder e Gion tier els. Quels ein vegni giu Samaria ed han urau per els, sinaquei ch’els retscheivien il Spert sogn. El fuva numnadamein vegnius sur da negin dad els; els eran mo battegiai el num dil Segner Jesus. Lu han ei imponiu ils mauns ad els, ed els han retschiert il Spert sogn.
