da Maria Cristina Derungs-Bartolomei
Il «di de Tschuncheismas» ei per sogn Lucas, igl autur dils Fatgs, 50 dis suenter Pastgas. Sia moda de metter el temps ils differents aspects dil misteri pascal ei daventada era la nossa. Tenor s. Gion ei Tschuncheismas, il dun dil sogn Spert, il medem di de Pastgas, la sera, sco nus havein udiu els evangelis dellas duas davosas dumengias. Igl entir temps de Pastgas ei contemplaziun de Jesus levaus si da mort en veta ella glisch dil sogn Spert, senza il qual nos senns e nies spért restan tschocs.
Quei che Pieder metta a cor a nus tuts ei da renconuscher il Crucifigau en Quel ch’ei levaus si. Quei mida radicalmein nos criteris de valetaziun, nossa moda da veser la realitad, da veser nusezs, ils auters, la veta, nossa moda da patertgar. Quei ei premissa per seschar battegiar «en num da Jesus», ed ei era fretg de quei Batten: Deponer il vegl carstgaun, «sfundrar» sesez ella veta de Cristus per retscheiver Siu Spert che dat veta nova e tarmetta a viver en moda nova.
Generaziun zanistrada ei quella de tut temps; quei essan nus aschilunsch che nus havein nusezs sco idol. Da quella fossa savein nus buca levar si ord atgnas forzas. Nus savein denton «seschar spindrar»: prender il maun ch’il Segner tonscha a nus e suandar Sia vusch e Siu plaid.
Fatgs 2,14a.36–41
Il di da Tschuncheismas ei Pieder sepresentaus ensemen culs endisch. El ha alzau sia vusch ed entschiet a plidar: Cun franchezia duei l’entira casa d’Israel enconuscher: Gest quei Jesus che vus veis crucifigau ha Dieus fatg daventar il Segner e Messias.
Udend quei ein els vegni tuccai el cor ed han detg a Pieder ed als auters apostels: Frars, tgei duein nus far? Pieder ha rispundiu ad els: Midei patratg e seconverti, e scadin da vus selaschi battegiar el num da Jesus Cristus en remischun da vos puccaus. Lu vegnis vus a retscheiver il dun dil Spert sogn. Pertgei per vus e vos affons vala l’empermischun e per tut quels ch’ein el lontan e ch’il Segner nies Diu vegn a clamar neutier. Aunc cun biars auters plaids ha el encuretg da perschuader els ed ha admoniu els: Seschei spindrar ord questa generaziun zanistrada! E quels che han acceptau siu plaid ein seschai battegiar, e quei di ein entuorn treimelli persunas vegnidas vitier.
Ed il plaid dil Segner ei sederasaus per l’entira cuntrada. Mo ils Gedius han stigau las dunnauns noblas e da tema da Diu sco era ils emprems dil marcau. Ei han instradau ina persecuziun encunter Paulus e Barnabas e catschau els ord lur cuntrada. Quels denton han scurlau encunter els la puorla giud lur peis ed ein i ad Iconium. Ed ils giuvnals fuvan plein legria e Spert sogn.
