da sur Martin Bearth
Il pievel d’Israel pretenda in retg. Il profet Samuel duei procurar persuenter. Duei quei retg esser in um cun ferms pugns, ni in cun inschign ed experientscha el cumbat, duei el esser in perdert, in spert, in…? – Oha! Dieus ha auters plans: «Dieus mira buca sin quei ch’il carstgaun mira; il carstgaun mira silla pareta, mo il Segner mira sil cor.» Ed il Spert dil Segner vegn sin David, sin in giuven e sempel nurser, e resta sin el.
Sin tgei mirein nus? Per exempel cu nus vein d’eleger enzatgi per in post ni l’auter? Mein era nus la via da Samuel, mirond mo sigl extern dil carstgaun? Ni dumandein nus era Diu per cussegl, mirond era sil «cor» dil pertuccau: Sin siu caracter, sia demanonza, sia sempladad, sia relaziun en famiglia e contuorn, sinceradad, gestadad e buontad? Il Spert dil Segner pren albiert, nua ch’el anfla in bien cor, sco tier David, il sempel nurser.
1 Sam 16,1b.6–7.10–13a
Lezs dis ha il Segner detg a Samuel: Con ditg vul ti esser cuntristaus per amur da Saul, il qual jeu hai gie rufidau, ch’el seigi buca pli retg sur dad Israel? Emplenescha tiu tgiern cun ieli e va; jeu vi tarmetter tei tier Isai da Betlehem; pertgei in da ses fegls hai jeu tscherniu per retg.
Cu Samuel ei vegnius ed ha viu Eliab, ha el tertgau: Per franc ei quel il regent dil Segner, siu unschiu! Mo il Segner di a Samuel: Buca mira sin sia pareta ed aulta statura; quel vi jeu buc. Pertgei Dieus mira buca sin quei ch’il carstgaun mira; il carstgaun mira silla pareta, mo il Segner mira sil cor.
Aschia fa Isai passar ses siat fegls avon Samuel. Mo Samuel di ad Isai: Quels ha il Segner buc eligiu. Lu damonda Samuel Isai: Ei quei tut ils mats? El rispunda: Il pli giuven maunca aunc; quel pertgira las nuorsas. Samuel di ad Isai: Fai ir per el, pertgei nus sesein buc a meisa, tochen ch’el ei buca cheu.
Cheu ha Isai fatg ir per el. El veva cavels cotschens, in giuven cun bials egls e beincarschius. Ed il Segner di: Si, unscha quel; el ei il dretg! Cheu pren Samuel il tgiern d’ieli ed unscha el enamiez denter ses frars. Ed il spért dil Segner ei vegnius sin David ed ei restaus sin el da quei di naven. plaidexplicaziun
