da Flurina Cavegn-Tomaschett
«Vus dueis esser sogns, pertgei era jeu sun sogns, jeu, il Segner vies Diu.» Quels plaids ein buca mo part dalla lecziun, mobein il coc digl entir Veder Testament. Ils plaids pon bein parer empau stravagai e provocheschan forsa sentiments dad esser surdumandaus ni surdumandada. Esser sogns sco Diu – quei va bein buc!
Constat. Perquei ha ei era buca num: Seigies sogns, sco jeu, mobein seigies sogns, pertgei era jeu sun sogns. Nus duein buca esser sogns sco Diu, mobein perquei che Diu ei sogns. «Sogns» ei Dieus perquei ch’el ei auters che quei che nus giudichein sco normal. En quei esser auters duein nus imitar Diu.
Lev 19,1–2.17–18
Il Segner ha plidau cun Moses e detg:
Plaida cull’entira raspada dils Israelits
e di ad els: Vus dueis esser sogns,
pertgei era jeu sun sogns, jeu, il Segner vies Diu.
Ti dueis buca odiar tiu frar en tiu cor, mobein admonir tiu proxim, che ti carghies buca puccau sin tetez per amur dad el. Ti dueis buca far vendetga, era buc purtar gretta encunter tes cunvischins, ti dueis tener car tiu proxim sco tetez. Jeu sun il Segner.
