da sur Marcus Flury
En quella lecziun crodan treis cavazzins en egl: Malgiustia, manzegna, tschontschas faulsas. Quei critichescha il profet Zefanja, pertgei quei metta en malura il pievel. Per che quei pievel sappi «pascular e star en muletgs» sto el encurir giustia, humilitonza, pia quei ch’ei bien ed endretg avon Diu ed ils carstgauns. Il profet dat speronza al pievel pauper e humiliau che va quella via.
Mirond sils problems da nies temps, san quels plaids profetics era esser per nus muossavia e consolaziun. La damonda ei: Tgei anflein nus normal? Acceptein nus malgiustia, manzegna e tschontschas faulsas sco normalitad en nossa societad, ni sestentein nus per giustia, sinceradad e verdeivladad, per ch’ils carstgauns sappien «pascular e star en muletgs, senza vegnir disturbai».
Jes 66,10–14c
Encuri il Segner, tut vus mudests dalla tiara che veis salvau sias ordras! Encuri la giustia, tscherchei la humilitonza! Forsa che vus anfleis schurmetg il di dalla gretta dil Segner.
Jeu lasch vanzar en tiu miez in pievel bass ed humiliteivel, da quels che prendan refugi tiel Segner. Quei rest d’Israel commetta buca dil mal e di neginas manzegnas. Tschontschas faulsas ein buca d’anflar en lur bucca. Els san pascular e star en muletg, senza vegnir disturbai.
☛ evangeli dalla dumengia: Mt 5,1–12a
