da Maria Cristina Derungs-Bartolomei
Quei text de Jesaja vegn citaus egl evangeli ded oz: Jesus va da Nazaret ella tiara de Sebulon e Naftali (duas dellas schlattas, numnadas tenor ils dudisch fegls de Jacob), ualti malfamada per il contact cun pagauns e per elements heretics ella cardientscha. Grad ord quella tiara vegn a vegnir la glisch dil Plaid de Diu.
Jesaja profetisescha la liberaziun dals Assirians che vevan priu en quellas regiuns dil nord (745–726 a. Cr., retg Tiglatpilesar III). Mo sia profezia va sur il temps dils Babilonès e Persians tochen tier Jesus e tochen nus. Il cuntrast denter la stgiradetgna ed ina gronda glisch che s’envida en quella stat el context aunc dil temps liturgic de Nadal che va ensemen cun la stagiun d’unviern: Pauc glisch duront ils cuorts dis. Denton buca mo la naschientscha, mobein la veta publica de Jesus ch’entscheiva «oz» ei quella glisch annunziada dal profet.
Ins vesa: Ils schabetgs e lur muntada s’entretschan en ina historia dil salit, ch’ei sco ina reit che salva e spendra ils cartents dils muments stgirs. La veta, mort e levada de Jesus cumpletescha per adina la reit de salvament che tonscha sur mellis d’onns tochen igl «ussa» della celebraziun liturgica.
Jes 8,23b–9,3
Sco il vargau ha purtau zanur alla tiara da Sebulon ed alla tiara da Naftali, vegn il futur a purtar honur alla via dalla mar che traversa il Jordan, la regiun dils pagauns.
Il pievel che viandescha ella stgiradetgna
vesa ina gronda glisch;
quels che avdan ella tiara d’umbrivas,
sur els resplend’ina glisch.
Gronds fas ti esser il giubel,
cumpleins il legherment.
Ins selegr’avon tei
sco quei ch’ins selegra dalla raccolta,
sco quei ch’ins gibla enten reparter la preda.
Pertgei il giuv che pesava sin el,
la trav sin sia schuiala,
il bastun da siu catschader,
quei sfraccas ti sco il di da Midian.
